Quantas ovras ch’el ha gia cumponì, na sa Flavio Bundi betg dir. El manegia che quai pudess esser insanua tranter 150 e 200 cumposiziuns. El haja simplamain ina giada cumenzà e cura ch’el haja udì co sia ovra chantada dad in chor tuna, haja el constatà che quai saja gnanc uschè mal ed ha cumponì vinavant, raquinta il giuven da 28 onns.
Cumponer ina messa, quai è insatge che Flavio Bundi ha gia daditg ina giada vulì far. «Jau sun vegnì influenzà dals chors nua ch’jau hai chantà» declera el vinavant. Cunzunt cun far la matura a Mustér en la scola claustrala e chantar en il chor. En quest chor haja el chantà bleras messas ed uschia cumponia el ussa era fitg gugent ovras sacralas. La primaudiziun da “Die Josefsmesse” ha Flavio Bundi gist studegià en cun il chor kontra.cant, ch’el ha fundà 2012. Il chor cun giuvnas chantaduras e giuvens chantadurs saja fitg avert, uschia che quai saja nagin problem sch’il chor haja da chantar fitg savens ovras ch’el haja scrit, di Flavio Bundi.
Esser liber da far quai ch’ins vul
Flavio Bundi terminescha ses studi da germanistica l’auter onn. El n’ha sapientiv betg studegià musica, quai malgrà ch’i fiss stà in grond siemi da studegiar musica da film. «Jau hai pensà, sche jau studegia musica, lura stoi jau far musica. Ussa cun mes studi da germanistica sun jau fitg liber da far tge ch’jau vi e cura ch’jau vi». Per Flavio Bundi è quai uschia in grond avantatg. Ideas tge ch’el vul anc cumponer datti avunda. Uschia è per exempel ina ovra cun ils “set ultims pleds da Jesus vid la crusch” in idea ubain era quella da cumponer ina giada in musical.
La messa è d’udir ils 7 da november en la baselgia da la claustra da Gion, las 20:00 ed ils 8 da november en la baselgia Pleif a Vella las 17:00.