En quest cudesch ha il biadi da Giachen Mihel Nay, l’anteriur derschader federal Giusep Nay, scrit ina biografia sur dal tat, sia vita e sia famiglia. Giusep Nay n'ha dentant betg enconuschì persunalmain ses tat, perquai ch’el è naschì il 1942. Mo el sa bleras anecdotas dad el, perquai che quellas vegnivan raquintadas en famiglia ed en il vitg:
Cun ses viturin era el ì sper duas damas ora, schend a quel: Fan nagut, maglian nagut, chajan aber era nagut.
A la dumonda: Quants chaus èsi atgnamain en il Cussegl grond, ha el respundì: Chaus na sai jau betg, tgils èsi 120 (schess el oz).
«La vacca pugniera»
Giachen Mihel Nay è naschì a Zignau, ha studegià medischina a Basilea ed è sa chasà cun sia famiglia (diesch uffants) la finala a Lumneins. Questa chasa gronda cun in’architectura speziala dat anc oz en egl. Sco Giusep Nay raquinta, haja sia dunna Berta Portmann «importà» questa architectura.
Il medi, pur, politicher (deputà en il Cussegl Grond) è vegni enconuschent surtut cun ses raquints che tractan il mund puril, per exempel «La vacca pugniera».
La vacca pugniera è tenor mai il text cun la pli gronda tensiun, perquai ch’el vegn da crear in’atmosfera da cumbat.
Quest text è vegnì translatà en plirs linguatgs. Il cudesch da Renzo Caduff cuntegna sper translaziuns era texts dad auters auturs cun motivs sumegliants sco Nay, uschia che las lecturas ed ils lecturs pon cumparegliar quels.
Scrivent dals purs
Giachen Mihel Nay è daventa il «scrivent dals purs» ed era fitg popular da ses temp. E perquai saja quai era interessant da leger anc oz sias ovras, di il romanist e docent a las universitads da Friburg e Genevra.
El è fitg datiers dal linguatg pledà cun discurs directs ed interessants dialogs tranter las persunas.