Giancarlo Malchiodi: puspè daventar Svizzer è ina chaussa dal cor

Giancarlo Malchiodi da Brooklyn ha ragischs rumantschas. Ussa fa el la dumonda da puspè survegnir il dretg da burgais svizzer.

Giancarlo Malchiodi Bild in Lightbox öffnen.

Legenda da maletgs: Giancarlo Malchiodi durant il curs da rumantsch a Glion la stad vargada. RTR, Gion Hosang

Il giavisch da puspè survegnir il dretg da burgais svizzer n'haja betg exnum in niz pratic. I saja ina chaussa dal cor. El haja bleras bellas regurdientschas da la Svizra, declera Giancarlo Malchiodi. Sco sia mamma Amalia, ch'è oriunda da Sagogn e ch'è emigrada en l'America raquinta, sajan els stads ils emprims onns da vita da Giancarlo prest mintga stad a Sagogn. «Giancarlo discurriva detg stupent rumantsch e tudestg» di Amalia. Cura ch'el haja dentant gì dad ir a scola na saja quai betg pli stà pussaivel. Uschia saja lura era l'interess per la Svizra, per il rumantsch ed il tudestg svanì. Giancarlo haja insacura lura ditg, jau sun American e jau na discurra betg pli autras linguas.

Dà giu il dretg da burgais sco giuvenil

Entras il film «Amalia e Giancarlo», ubain la versiun extendida per kino e la televisiun svizra cun il titel «Ciao Babylon», saja el puspè vegnì conscient che la Svizra saja era sia patria. Gia durant il curs da rumantsch a Glion la stad vargada ha Giancarlo Malchiodi sclerì cun l'ambassada Svizra a New York, tge ch'el stoppia far per puspè survegnir il dretg da burgais svizzer.

I dovria ina pluna documents ed era in discurs en l'ambassada davart la Svizra e sia cultura. Ils documents sajan inoltrads. Cura ch'el possia far il discurs e quant spert che quai va insumma na sa Giancarlo Malchiodi betg dir. Desistì sin il dretg da burgais svizzer ha el cun 19 onns cura ch'el avess gì da pajar taglia da militar en Svizra. La situaziun finanziala na lubiva betg quai da lez temp, declera il scolast d'englais che ha 50 onns. Cun ni senza pass svizzer, quinta el da vegnir mintg'auter onn en Svizra e lura era mintgamai emprender in zichel rumantsch.

RR actualitad 11:00