Las sfidas d’organisar in inscunter cun radund 350 persunas èn multifaras. Uschia èsi da guardar che tuts vegnan sut tetg e lura era ch’il program accumpagnant constat. A Mustér hajan ins chattà relaziuns idealas, quai en il resort Catrina sco er en il center da sport Fontauna, uschia il president dal comité d’organisaziun Toni Darms. La pandemia ha dentant l’onn passà impedì da manar tras la radunanza planisada, uschia ha tut stuì vegnir spustà per in onn. En il fratemp ha la vischnanca dentant cumenzà cun las lavurs da renovaziun e sanaziun en il center da sport. Quai ha muntà lavur supplementara d’organisaziun.
Comité stà fidaivel
Sin la lavur da ses comité d’organisaziun ha Toni Darms pudì sa fidar, di l’anteriur cuschinier ed ustier. Uschia sajan tut ils set commembers stads motivads ed adina fitg engaschads, era sche l’organisaziun ha surpassà il temp ordinar d’in onn sin quasi trais onns. I na saja betg da sutvalitar sch'i funcziunia en in tal comité, e quai saja stà il cas, uschia Toni Darms.
Per l’um ch’ha manà blers onns in manaschi a Glion èsi l’ultim engaschi a favur da la Gilda ed è stà in dals puncts culminants. El saja led ch’els hajan chattà successurs per el sco cassier da la «Gilda Svizra» ed era per la «Gilda Grischa». Insatge saja dentant er stà a cor ad el avant la finiziun da ses engaschi. La lingua rumantscha saja tar quest inscunter propi preschenta, uschia sajan tut ils menus per la saira da gala per rumantsch, quai saja ina premiera ed in omagi al Grischun rumantsch – sia patria, uschia Toni Darms.