Siglir tar il cuntegn

Header

audio
Claustra Mustér: Svaris en il gimnasi
Or da Actualitad dals 30.12.2022. Maletg: RTR
laschar ir. Durada: 4 minutas 14 Secundas.
cuntegn

Gimnasi Claustra Mustér Ina disditga da plazza procura per malruaus

Al gimnasi claustral a Mustér procura ina visada da la plazza da lavur per irritaziun. La persuna pertutgada sa dosta, ils geniturs èn preoccupads.

video
Visada da plazza al gimnasi da Mustér
Or da Telesguard dals 30.12.2022.
laschar ir. Durada: 4 minutas 24 Secundas.

Visada da la plazza dus dis avant Nadal

Ils 22 da december ha Barbara Kipfer survegnì in telefon dal rectur dal gimnasi, Tom Etter, ch'ella stoppia cumparair per in discurs persunal en biro. En quest discurs è vegnì communitgà a la dunna che fascheva enfin lura la surveglianza dals uffants e giuvenils en l'internat, ina uschenumnada prefecta, che sia plazza vegnia visada. La collavuraziun saja terminada per immediat ed ella haja in scumond d'access a l'internat ed a las localitads da scola. Vitiers vegnia in scumond da discurrer cun ils uffants da l'internat e cun ils geniturs da quels.

En la disditga stat scrit che la direcziun n'haja nagina fidanza en mia prestaziun da lavur. Jau na pos entschaiver nagut cun quai.
Autur: Barbara Kipfer prefecta

I va per il stil da manar

Barbara Kipfer punctuescha envers RTR ch'igl haja dà ils davos mais difficultads tranter la manadra da l'internat ed intginas persunas da team da surveglianza. Las propostas da far diever d'ina supervisiun, pia da prender sustegn d'ordaifer, hajan tant la manadra da l'institut sco era il rectur dal gimnasi renvià. En general pertutgan las differenzas la moda e maniera co ir enturn cun ils uffants e giuvenils che vivan durant l'emna en l'internat. Enfin ussa saja la tenuta stada da bajegiar si ina relaziun cun ils uffants e giuvenils e da dar a quels sustegn e chapientscha cura ch'els vegnian cun lur problems tar ils prefects e las prefectas. Ussa emprovia la manadra d'introducir in sistem repressiv e da controlla, uschia Kipfer.

A mai èsi vegnì ditg che jau na saja betg la mamma dals uffants e che quai na saja betg ina chasa d'uffants e giuvenils.
Autur: Barbara Kipfer prefecta

Il rectur prenda posiziun a scrit

Sin fundament da las explicaziuns da Barbara Kipfer ha RTR contactà il rectur dal gimnasi.

  • Tge è la raschun exacta da la disditga?
  • Hai dà discurs u admoniziuns a scrit avant la disditga?
  • Daco han ins elegì la via da terminar per immediat la collavuraziun e dà in scumond d'access a l'areal?
  • Constat la pretensiun da Barbara Kipfer, ch'il nov persunal che vegn uss tschentà en per l'internat n'haja betg las qualificaziuns necessarias?

Sin las dumondas che RTR ha tschentà en quest connex ha il rectur Tom Etter prendì posiziun a scrit.

Resposta a scrit dal rectur

Avrir la box Serrar la box

Die Schulleitung kann und wird sich in der Öffentlichkeit nicht zu Arbeitsverhältnissen einzelner Mitarbeiterinnen äussern. Sie können davon ausgehen, dass wir den Sachverhalt vor Aussprache der Kündigung gewissenhaft abgeklärt haben. Gerade weil eine Kündigung auch arbeitsrechtlich bei einer Überprüfung durch Drittparteien standhalten muss.

Geniturs fan quitads

Plirs geniturs èn, suenter ch'els han intervegnì la situaziun tar l'internat dal gimnasi, s'annunziads tar il directori da quel e tar l'avat Vigeli Monn per communitgar lur quitads. En questas brevs che RTR ha enconuschientscha, constateschan ils geniturs ch'els han percurschì ina midada da valurs en l'internat e sperian per amur da lur uffants ch'ils problems vegnian schliads per il bun da lur uffants.

Avat Vigeli Monn na prenda betg posiziun

RTR ha dumandà l'Avat Vigeli Monn pertutgant la situaziun. L'avat ha ditg ch'el na prendia nagina posiziun en chaussa.

RTR actualitad 12:00

Artitgels legids il pli savens