«En il Zinsli chattan ins tut.» Quai n'è betg mo la parola, cun la quala la butia fa reclama, mabain era quai ch'ins auda da la clientella e dal persunal. Il sortiment tanscha da maschinas da café, termagls per uffants e souvenirs enfin a maschinas, guaffens pitschens e gronds, in sortiment da grill e dapli. 45'000 artitgels porscha il Zinsli amez la citad da Glion. E sco quai che Bettina Zinsli Paulin di, saja quai era ina da las raschuns, daco che la butia haja success dapi tants onns:
Nus avain adina udì ch'ils 'gronds' na mangian betg ils 'pitschens' – mabain ils 'plauns'.
Cun quella filosofia sajan els adina stads attents ed averts per novs trends e products. Quai conferma era Christian-Peter Zinsli, il frar da Bettina Zinsli Paulin, e possessur da la butia ch'ha actualmain 25 collavuraturas e collavuraturs. Il giubileum da 70 onns sveglia regurdientschas da pli baud, di Bettina Zinsli Paulin. Per exempel ch'ella haja gia da pitschna vendì satgets per cazzolas da benzin u battagls per stgelas dals animals.
Ed il grond sortiment sin ina surfatscha da 1100 meters quadrats fetschia era che la lavur saja varianta ed interessanta, din intginas da las emploiadas e dals emploiads. Quai tant en la partiziun da tegnair-chasa sco era en la partiziun da ferramenta e maschinas. E la vasta schelta saja per franc era ina da las raschuns per il success da la fatschenta.
Nus ans dain giu cun la clientella ed enconuschain era fitg bain intginas persunas. Quellas vegnan lura adina puspè gugent.
-
Bild 1 von 2. Ronia Pfister, Romina Christoffel, Annina Derungs (emprendista) e Sofia Cathomen èn part dal team responsabel per la partiziun da tegnair-chasa. Bildquelle: RTR.
-
Bild 2 von 2. Roni Caminada, Sven Tomaschett e Rafael Derungs han tranter auter da guardar da las maschinas. Bildquelle: RTR.
Era il bun spiert da team saja ina da las raschuns, daco ch'el lavuria gugent qua, di Roni Caminada ch'è dapi 14 onns tar Zinsli a Glion, nua ch'el ha gia fatg l’emprendissadi.
Coola truppa, cool team – Qua fai plaschair da lavurar.