Atgnamain avess la revisiun parziala da la lescha da charrar sin vias agriculas e forestalas prevesì ch'il pled «vignetta» vegnia stritgà per che la lescha saja pronta per la digitalisaziun. Plinavant vuleva la vischnanca midar l'artitgel davart las lubientschas spezialas per pudair dar ina tala lubientscha sch'in motiv impurtant è avant maun. Sin passa 50 tschancuns da via savess ins en il futur mo pli charrar cun questa lubientscha speziala.
Il parlament ha suandà la dumonda dal parlamentari Claudio Quinter (Allianza dal Center) e renvià la fatschenta cun 15 encunter 8 vuschs. La vischnanca stoppia anc ina giada reelavurar ina proposta che saja pratica e sche pussaivel stritgar tschertas disposiziuns tar las lubientschas spezialas. Questa decisiun retardescha ils plans da la vischnanca d'introducir las lubientscha digitalas sin entschatta da l'auter onn. Plinavant èn las lavurs d'armonisar e signalisar da nov las vias agriculas e forestalas uschia sistidas. La saira d'infurmaziun tar quai tema ch'era prevesida il 20 d'avrigl a Ruschein, vegnia tuttina manada tras, uschia la communicaziun uffiziala a posteriori. La vischnanca aveva publitgà mez favrer ses plans da restrenscher tscherts tschancuns da las vias agriculas e forestalas. La reacziun sin quest pass èn varga 60 protestas che la vischnanca ha uss da tractar.
Nagin credit per la festa da giubileum da 10 onns fusiun
En l'onn 2024 festivescha la vischnanca da Glion ses 10avel anniversari sco vischnanca fusiunada. Ella è dapi la fusiun la sisavla gronda vischnanca en il chantun Grischun. La suprastanza avess gugent organisà ina festa da giubileum, il credit latiers: 345'000 francs. Questa festa avess gì l'intent da promover il spiert da cuminanza e da consolidar la vischnanca cun tut sias fracziuns. La moziun da Claudio Quinter (Allianza dal Center) da er renviar questa fatschenta e proponer in credit da 80'000 francs, n'è il parlament betg suandà, ma silsuenter ha la fatschenta tuttina fatg naufragi. Cun 11 encunter 10 vuschs n'ha il parlament betg approvà il credit.
En principi è il gust per ina festa da giubileum qua, ma na betg en questa dimensiun.
Per bleras era la summa memia auta per tscherts è la fusiun vinavant connotada negativamain. Surtut las parlamentarias ed ils parlamentaris giuvens han vuschà per las festivitads en la grondezza proponida. Ils arguments ch'ils daners fissan vegnids dabun a l'economia locala ed a las uniuns n'ha betg pudì s'imponer tar il parlament.
Il parlament na vul betg ina festa, uschia na faschain nus betg ina festa.
Construcziun da duas novas fermadas da posta
Approvà ha il parlament in credit da 360'000 francs per sanar e construir duas fermadas da posta tenor ils basegns da persunas cun impediment a la Porta Sura a Glion. Plinavant vegn i a dar ina strivla melna tar la staziun en la Via da Val ed ina strivla melna en la Via Porclas. La vischnanca quinta cun subvenziuns dal chantun da radund 150'000 francs per la sanaziun e construcziun.
