Tenor ina communicaziun da medias da la vischnanca da Glion è il gudogn da 2,1 milliuns francs cunzunt d’attribuir ad in surpli d’entradas da taglias, pli bassas amortisaziuns che planisà ed a mesiras da spargn.
La cumissiun da gestiun avertescha
Quai bun resultat saja dentant da prender cun precauziun. Il basegns d’investiziuns en l’infrastructura sajan fitg grondas ils proxims onns.
Las investiziuns nettas per l’onn 2015 muntan a 5,4 milliuns francs. Quellas investiziuns èn dentant mo finanziadas per part cun agens meds. Il grad d’autofinanziaziun munta a 41,6 %. Quai vul dir che la vischnanca da Glion ha stuì far novs debits da bunamain 3,2 milliuns francs. Per cuntanscher in quint equilibrà fiss in grad d’autofinanziaziun da 100 % necessari.
20 milliuns francs credits d'obligaziun
Per l’onn 2016 èn planisadas danovamain investiziuns nettas da 7,5 milliuns francs. Cunquai ch’il parlament da la vischnanca da Glion ha gia consentì investiziuns resp. credits d’obligaziun cun ina summa totala da 20 milliuns francs, èsi da quintar cun in augment considerabel da l’indebitament da la vischnanca ils proxims onns. Perquai propona la cumissiun da gestiun d’introducir igl instrument da la planisaziun da finanzas e da era discutar quella planisaziun en il parlament.
RR actualitad 11:00