Siglir tar il cuntegn

Header

cuntegn

Surselva Glion: Lainaris e scrinaris sut in tetg – unic en Svizra

En la nova scola professiunala a Glion lavuran lainaris e scrinaris maun en maun e pon uschia era profitar in da l’auter.

Cumparegliaziun dals maletgs

Stuschar reglader a sanestra Stuschar reglader a dretga
Legenda: Avant e suenter la renovaziun Scola professiunala Glion

Avant quatter onns ha l'Uniun svizra da lainaris decidì da prolungar l'emprendissadi dals lainaris da 3 sin 4 onns. Quai ha gì consequenzas per tut las scolas professiunalas en Svizra, uschia era per quella da Glion. Uss han las stanzas da scolaziun stuì vegnir adattadas als basegns novs.

Basegns creschids

Uschia dovra quai locals da curs cun dubla autezza, per ch'ils lainaris possian vegnir scolads sin las maschinas sco cranas. Medemamain appartegn a la scolaziun lavurs en l'autezza cun sugas. Tut quai po succeder uss en las localitads novas a Glion. Christian Schürch, responsabel per la scolaziun dals lainaris e sez instructur, manegia che Glion porschia anc bler dapli. Ils scrinaris han numnadamain lur localitads da curs gist dasperas, ed uschia possian ins profitar d’in bler pli grond parc da maschinas.

video
Dapli plaz per ils lainaris: La scola professiunala a Glion è engrondida
Or da sil punct dals 23.07.2018.
laschar ir. Durada: 1 minuta 39 Secundas.

Sfida architectonica

Il bajetg han ins realisà en be in onn. Quai ha pretendì ina planisaziun fitg detagliada, manegia l'architect Rico Carigiet. La scola veglia era in bajetg da pliras generaziuns. Las localitads da curs eran pli baud il local da pumpiers da Glion. Ussa cumpara quest bajetg sco in'unitad. Il cubus da betun ch’ins veseva pli baud è uss pachetà en lain. Quai saja stà in giavisch dals patruns, ha ditg Carigiet.

audio
Saira: Lainaris e scrinaris sut in tetg
ord Actualitad dals 23.07.2018.
laschar ir. Durada: 2 minutas 50 Secundas.

La scola ed ils locals da curs pon vegnir retratgs sin termin, vul dir ch'il manaschi da scola po cumenzar sco planisà la fin d'avust.

RR actualitad 17:00

Artitgels legids il pli savens