Segir è ch'il Mundaun na stat betg airi pervi da quai na da Glion. La regiun enturn il Mundaun vegn dentant franada bravamain da quai na.
Glion n'è anc betg pront per la collavuraziun turistica. Quai para curius. Èsi quels dals vischinadis sco Rueun, Ruschein, Ladir u Siat che han cundiziuns spezialas en il territori da skis da l'Arena Alva – ed èn uschia colliads cun gliez territori? N'han quels betg vis la necessitad che la vischnanca fusiunada fiss finalmain vegnida colliada cun in territori da skis. L'entira vischnanca da Glion vess pudì esser indigens en il territori da Sursaissa Mundaun.
Danunder ch'il na è vegnì – è el propi vegnì da quels vischinadis menziunads? – fiss en questa chaussa fitg interessant da savair.
Hai mancà vi da la solidaritad tranter ils vischinadis? U èsi simplamain il spargnar che ha manà tar quest na? Glion avess stuì investir 1,38 milliuns e dar ina garanzia per 3,6 milliuns per la Infra mundaun SA. Daners ch'els na han betg, ha il suveran decidì.
Spargnà en il fauss lieu, pertge era Glion viva dal turissem – e betg mo da quel da Flem, Laax e Falera.
La surpraisa ch'i ha dà in na è da sentir da tuttas varts. Fatg insatge per in gea n'han ins dentant era betg. Las campagnas per in gea n'hai simplamain betg dà. E campagnas encunter la Infra Mundaun SA n'er betg. Las opiniuns èn vegnidas fatgas a chasa en stiva ed entras paucas brevs da lecturs e duas sairas d'infurmaziun.
Per l'avegnir sto esser cler: Quai na tanscha betg cu i va per l'avegnir d'ina entira regiun. La chaura ch'è crappada è era la chaura che dat latg a l'entira regiun enturn il Mundaun. Il latg vegn a mancar.
RR novitads 17:00
