Il nov MRI da l’ospital regiunal a Glion è vegnì furnì oz avantmezdi. Enfin ch’el va en funcziun dovri dentant anc pliras controllas e tests, uschia che las emprimas examinaziuns vegnan a succeder pir l’entschatta december. Tenor indicaziuns da l’ospital ha il nov apparat custà ca. 950’000 francs.
Quai nov MRI a Glion è tenor il directur da l’ospital Marcus Caduff il fritg d'ina stretga collavuraziun cun l’ospital chantunal. Per ina ha l'apparat grazia a quels contacts custà circa 300'000 francs pli pauc, pia 950'000 enstagl da 1,25 milliuns francs. E cunquai ch'il MRI a Glion è il medem model sco ils apparats da l’ospital chantunal, po il persunal vegnir scolà communablamain ubain era vegnir barattà tut tenor basegns.
Distgargiar l'ospital chantunal
Il nov MRI a Glion n’è tenor il directur da l’ospital Marcus Caduff betg ina concurrenza per l’ospital chantunal. Ils dus apparats da l’ospital chantunal èn en funcziun quasi di e notg. Pli che 7’300 examinaziuns èn vegnidas fatgas a Cuira l’onn 2016. Il temps da spetga enfin ch'in pazient survegn in termin per ir en il MRI munta a fin 3 emnas. Cun il nov MRI èsi uss pussibel da far las examinaziuns da pazients da la Surselva a Glion. Ultra da quai saja era pussibel, che pazients da l’ospital chantunal vegnian tramess a Glion per in MRI.
La collavuraziun cun l’ospital chantunal na duai era betg mo sa restrenscher sin il manaschi dal nov MRI. Sco Marcus Caduff ha infurmà, veglia el era collavurar a partir dal proxim onn sin il sectur da l’urologia e tar la cumpra da medicaments e material da consum.
RR actualitad 17:00