La vischnanca fusiunada da Glion duai survegnir en il sisavel onn d'existenza ina nova lescha da bajegiar. Quella duai unir las 13 differentas leschas fin uss sin ina singula. Il parlament ha approvà mesemna saira per mauns da la votaziun a l'urna la planisaziun locala e la lescha da bajegiar. Fertant ch'i n'ha betg dà grondas discussiuns davart la planisaziun locala, èn quellas davart la nova lescha da bajegiar stadas zunt pli intensivas.
Obligaziun da cussegl ha dà da discutar
Ils ultims onns aveva la vischnanca da Glion laschà cussegliar tar in terz dals cas da bajegiar relevants d'ina firma externa da Cuira. Quai fiss tenor il sboz da lescha ch'è vegnì preschentà mesemna stà il cas per tuttas dumondas en il futur. La pratica aveva dentant er chaschunà bleras reclamaziuns – e quellas reclamaziuns d'investiders e privats èn era stadas en il center da las discussiuns. A la fin è la cussegliaziun da bajegiar, che la nova lescha vuleva far per regla dentant vegnida restrenschida, per la zona da coc e la zona dal vitg.
RR novitads 12:00