Las lavurs da renovaziun duajan vegnir fatgas en la segunda mesadad da quest onn. Sco l’ospital regiunal scriva saja ina da las ideas da la purschida nova, da pussibilitar a medias e medis giuvens in access simplifitgà a la medischina da medis da chasa, senza stuair purtar il ristg organisatoric d’ina pratica singula. Era duai vegnir fatga uschia lavur da piunier per ina rait da sanadad en Surselva ed uschia segirar il provediment medicinal da basa e d’urgenza tras medis da chasa a lunga vista, scriva il Spital regiunal Surselva en ina communicaziun a als medias.
Nizzegiar sinergias
Planisà è che las medias ed ils medis pon nizzegiar las sinergias che l’ospital vischin porscha. Uschia possian spezialistas e spezialists vegnir consultads en cas da basegn, ma era l’infrastructura sco servetschs da radiologia u da labor possian vegnir nizzegiads a moda persistenta ed effizienta. Las pazientas ed ils pazients duajan dentant vegnir tractads da las medias en la pratica communabla nova a moda independenta.