Suenter tschintg onns ha il comité d'organisaziun da l'exposiziun Primavera gì avunda ed ha demissiunà. Sco Gaby Blum, Silvia Leonor e Gian Marco Bianchi – che fan part da la suprastanza da l'Uniun da commerzi e mastergn – han ditg en discurs cun la FMR, hajan intginas ed intgins da l'anteriur comité d'organisaziun betg pudì cuntinuar pli per motivs professiunals u privats. Las demissiuns n'hajan betg da far cun differenzas. «En la suprastanza da l'uniun da commerzi e mastergn essan nus plitost da l'idea ch'in nov comité stoppia sviluppar vinavant la Primavera.»
I va vinavant
Per l'Uniun da commerzi e mastergn da Glion e conturn èn las demissiuns vegnidas nunspetgadamain suenter ch'ins aveva gia stuì remplazzar curt avant la mesadad da la suprastanza da l'uniun. «I fiss dentant donn da betg cuntinuar cun la Primavera», di Gian Marco Bianchi. «Nus stuain ussa segirar che la savida organisatorica da l'exposiziun resta e ch'i dettia cuntinuitad.» Igl dat pia era l'onn 2027 ina Primavera. Al comité d'organisaziun appartegnan Gaby Blum, Silvia Leonor e Gian Marco Bianchi. I dat anc ulteriurs novs commembers. Quels vegnan installads en lur novas incumbensas a chaschun d'ina sesida. L'exposiziun Primavera vegn era sustegnida dal nov president da l'uniun da commerzi e mastergn, Manuel Montalta.
Proxima generaziun è dumandada
Ils responsabels da l'Uniun da commerzi e mastergn da Glion e conturn conferman che la mesadad da la suprastanza consista da commembers pli vegls cun experimentscha d'organisar ina exposiziun. I haja dentant era persunas giuvnas e pliras da quellas fetschian ussa part da la suprastanza. Ultra da quai hajan ins elegì en il comité d'organisaziun la giuvna ustiera Silvia Leonor che represchenta la gastronomia. Ella ha sco finamira da rinforzar la preschientscha da la gastronomia a la Primavera. Il nov comité è era a la tschertga da gidantras e gidanters voluntaris per la proxima exposiziun. Dapli sut www.hgv-ilanz.ch.