Glion: preventiv 2018 refusà, pe da taglia resta a 100%

Il parlament da la vischnanca da Glion ha refusà il preventiv 2018 e gist surdà a la suprastanza l'incumbensa da reducir las expensas tar las scolas per 5%. Era il parlament ha refusà d'auzar il pe da taglia da 100 sin 110%.

Laschar ir video «Glion: Il pe da taglia resta – la vischnanca duai dentant spargnar tar la scolas»

Glion: Il pe da taglia resta – la vischnanca duai dentant spar...

3:35 min, Telesguard dals 30.11.2017

La vischnanca da Glion dovra in pli aut cash-flow, in pli aut gudogn avant amortisaziuns, per pudair finanziar las investiziuns necessarias ils proxims onns senza far gronds daivets. La suprastanza ha perquai vulì auzar il pe da taglia per 10% (da 100% sin 110%) e generar uschia circa 900'000 francs dapli entradas. Reducir ils custs saja, tenor la suprastanza, strusch pli pussaivel.

Il parlament di «na»

Il parlament n'è dentant betg stà dal medem avis sco la suprastanza ed ha refusà, suenter ina lunga e viva discussiun, il preventiv 2018. Plirs parlamentaris han insistì ch'i stoppia esser pussaivel da spargnar anc dapli ed els han gist anc ditg a la suprastanza, nua ch'ella stoppia adattar il preventiv. Quai cunzunt tar ils custs da las scolas, custs che muntan a sur 11 milliuns francs per onn, bunamain la mesadad dals custs totals da la vischnanca (46%). Qua sto la suprastanza spargnar 5%.

Plinavant sto la suprastanza era adattar il preventiv per la selvicultura. Il parlament ha pretendì in preventiv gulivà, e betg in cun ina sperdita sco preschentà da la suprastanza.

Pe da taglia resta a 100%

Consequentamain ha il parlament era refusà d’auzar il pe da taglia da 100 sin 110%. L'emprim stoppia il preventiv vegnir adattà sco giavischà per reducir las expensas, avant ch'ins possia discutar d'auzar il pe da taglia per augmentar las entradas.

Ils pes da taglia en il GR 2016/2017

RR novitads 06:00