Fieus artifizials na sajan betg mo cumbinads cun festas - mabain era cun canera, rumient e privels. Era la suprastanza communala ha sustegnì l'idea per in scumond general en tuttas fracziuns da la vischnanca.
Er en in'autra tractanda è la vischnanca sa fatschentada cun la glisch artifiziala. Per midar l'illuminaziun publitga sin LED ha il parlament approvà in credit da bunamain 1 milliun francs. En il mument dettia anc blera illuminaziun convenziunala - enfin il 2025 duai dentant sulettamain dar glischs da LED. Entras quellas possian ins spargnar energia, custs ed evitar che l'ambient vegnia tschufragnads da glisch.
Renovaziun da la plazza da gieus
A Schnaus duai dar ina nova plazza da gieus ed il «Paradieswäldli» a Glion duai vegnir renovà. Per quest intent ha il parlament concedì in credit da 200'000 francs.
Sustegn finanzial datti dentant era per il project «Minas da Gulatsch» a Rueun. Quel prevesa da nizzegiar la valur turistica da las gallarias istoricas sur la vischnanca.
