Siglir tar il cuntegn
Inhalt

Surselva Glion: Situaziun finanziala difficila

Il quint 2017 da la vischnanca da Glion serra cun in gudogn da passa 1,8 milliuns francs. Quai cun in retgav da 32'448'142 francs. La situaziun finanziala resta dentant difficila.

Glion
Legenda: Glion RTR, L. Livers

Malgrà quest bun resultat saja la vischnanca enavant èn ina situaziun finanziala «in pau difficila». Quai scriva la presidenta communala Carmelia Maissen en il rapport da gestiun. L’atgna finanziaziun da las investiziuns muntia a 47 pertschient (grad d'autofinanziaziun). Ed ils proxims onns stoppia la vischnanca investir «considerablamain», perquai ch’il basegn da renovar l’infrastructura saja «fitg grond».

Grad d'autofinanziaziun

Personen-Box aufklappenPersonen-Box zuklappen

Quest grad inditgescha en tge dimensiun ch’ina vischnanca po far investiziuns novas grazia a meds gudagnads sez («selbsterwirtschaftet»). In grad d’autofinanziaziun sut 100% maina a novs debits (in grad sut 70% vala sco problematic). In grad d’autofinanziaziun sur 100% munta che debits pon vegnir reducids.

Entradas da taglia èn bassas

In fatg saja che las entradas da taglia sajan bassas. Tar questas entradas figureschia la vischnanca da Glion en l’ultim terz en Surselva. Las taglias da persunas natiralas muntan ad 8,7 milliuns francs, las taglias da persunas giuridicas ad 1,3 milliuns francs. Las taglias sin la midada da maun fan 1,3 milliuns, quai è dapli che l'onn avant (quint 2016: ca. 800’000 francs).

Auzar il pe da taglia?

Il facit da la cumissiun da gestiun è: Per che la vischnanca da Glion possia cuntanscher in grad d'autofinanziaziun da passa 80 % (la valur directiva: 80 – 100%), stoppian ins augmentar il cashflow sin passa 2 milliuns francs. Era sch’ins haja spargnà tant sco pussaivel, stoppia il parlament da Glion discutar la dumonda dad auzar il pe da taglia (quel è actualmain a 100%).

RR novitads 12:00