L’emprima fasa da la surbajegiada Marcau a Glion, ina surbajegiada da 43 milliuns francs, è a fin. Cun la tschentada dal crap da fundament vegn lantschà uffizialmain las lavurs da construcziun auta. Il plazzal ha ina lunghezza da 80m ed ina ladezza da 60m, ha pia ina surfatscha da 4’800 m2 , dapli che 18 plazzas da tennis. Planisads èn differentas stizuns sin duas auzadas, biros, 31 abitaziuns ed in parcadi sutterran per 178 autos. L’emprima badigliada ha gì lieu il zercladur 2016. Sche tut va sco planisà duain las stizuns ed ils biros esser pronts il settember 2018, las abitaziuns entschatta 2019.
Ina da las grondas tschaghegnas da la Svizra
Cunquai ch’il spazi entaifer il plazzal è limità, pon vegnir installadas mo 2 tschaghegnas. Ina cun in bratsch da 60 m ed ina cun in bratsch da 70 m, ina da las grondas tschaghegnas da la Svizra. In dals avantatgs d’ina tala tschaghegna è la paisa maximala che po vegnir auzada. Oradim il bratsch èn quai anc sur 3,5 tonnas. Quai cumpensescha il dischavantatg da na betg savair lavurar cun dapli tschaghegnas.