La suprastanza communala da Glion ha anc ina giada fatg la proposta da crear la plazza d'in sviluppader communal e spezialist da communicaziun. En la sesida dal mars aveva il parlament anc refusà quella idea ed ha returnà la fatschenta a la suprastanza. Da lez temp cun l'argument ch'ils pensums da lavur sajan memia vasts, e che mo ina persuna na possia betg ademplir tut las premissas.
En il segund chatsch hai funcziunà
Ussa ha la suprastanza communala definì da nov, co la plazza duai vesair ora. Las incumbensas planisadas èn restrenschidas sin il svilup communal e la communicaziun interna ed externa. La plazza è dotada cun 60% enfin 100%, e po tenor basegns era vegnir repartida sin duas persunas. Ils custs èn calculads tut tenor grad d'occupaziun cun tranter 72’000 e 120’000 francs.
Il parlament è stà cuntent cun la nova proposta da la suprastanza e ha approvà il credit per la nova plazza.
