Label per promover il turissem
Quest label vegn surdà da la Federaziun da las baselgias evangelicas da la Svizra. Survegnir il label n’attestass a la citad da Glion betg mo ina impurtanza istorica durant la refurmaziun mabain fissi era ina nova schanza da carmalar turists manegia Sur Jan-Andrea Bernhard che coordinescha las festivitads. Ina da las purschidas planisadas è in bigliet da tren per turists cun il qual ins po viagiar d’ina citad da refurmaziun tar la proxima.
Premissas per il label
Il disput tranter l’uvestg Paul Ziegler ed il refurmatur Johannes Comander ha gì lieu l’onn 1526 a Glion. Pli tard quest onn ha il Bundestag dal Grischun approvà ils segunds artitgels da Glion, ils quals han dà a las vischnancas Grischunas la pussaivladad da decider sezzas per ni encunter la refurmaziun. Ferms motivs per dar a Glion il label «citad da refurmaziun». Sche Glion survegn il label u betg decida la Federaziun da las baselgias evangelicas da la Svizra ils proxims dis.