Siglir tar il cuntegn

Surselva Glion vul tariffa d'indigens per tuts

Il parlamentari da la vischnanca da Glion, Glieci Camenisch, giavischa dapli solidaritad per las fracziuns da la nova vischnanca fusiunada. I va per las tariffas da pudair ir cun skis sco indigen.

La pendiculara dal Crap Sogn Gion a Laax.
Legenda: Tut ils burgais da la nova vischnanca fusiunada duain dastgar ir cun skis per ina tariffa d'indigens. Keystone

8 fracziuns da Glion han gia da questas cunvegnas che derivan da las vischnancas da pli baud. 5 fracziuns n’han naginas reducziuns. Il parlament da Glion ha ussa surdà l'incumbensa da sclerir cun las pendicularas da la destinaziun Surselva Turissem, cun Mundaun/Sursaissa e Breil/Vuorz/Andiast sch’ellas fissan prontas da tractar ils da Glion sco indigens.

Il parlament ha plinavant decis da lubir ina quota da 100% per l'aquist d'immobiglias entras persunas da l'exteriur. La decisiun è suttamessa al referendum facultativ.

Concept da parcar vegn surluvrà

Ultra da quai è vegnì installà ina cumissiun predeliberanta che duai surlavurar il concept da parcar en la citad da Glion. Il concept era da sias uras anc vegnì refusà da l'anteriura citad da Glion cun l'avis da laschar decider la nova suprastanza da la vischnanca fusiunada da Glion.

RR novitads 08:00