L'organisaziun dal campiunadi Grischun da golf va en roda dad in club a l'auter. D'ina vart saja quai blera lavur, da l'autra vart in bun mument per far attent sin l'agen club, di il president Alfons Livers. Dapi 2 onns è el president dal club da golf a Breil ed era da la societad acziunara che posseda l'entira infrastructura. Breil è in club cun 350 commembras e commembers ed ha 9 rusnas. Atgnamain duvrassan els 600 commembras e commembers. Quai saja dentant strusch realistic. En mintga cas vivian els per ina gronda part era dal turissem da golf.
Plans d'engrondir la plazza sin 18 rusnas
Ils plans per engrondir la plazza da golf existenta cun 9 rusnas sin ina da 18 rusnas èn avantmaun. Era l'areal saja gia en ina zona da golf, di il president Alfons Livers ch'ha en mira da pudair realisar quest engrondiment en 3 fin 4 onns.
Anc saja da sclerir intginas chaussas ed era la finanziaziun n'è anc betg sclerida definitivamain. In engrondiment portia dentant novs giasts cunquai che blers golfists e bleras golfistas prefereschien da far lur giug sin ina plazza da 18 rusnas.
