Siglir tar il cuntegn

Header

Lai da Sontga Maria al pass dal Lucmagn
Legenda: Lai da Sontga Maria al pass dal Lucmagn RTR, G. Hosang
cuntegn

Surselva Grazia a plievgia e naiv - dapli gudogn per ovras electricas

L’atun 2014 ha quai pluvì savens e l’enviern 2014/15 hai dà blera naiv. Perquai han las ovras electricas Rain anteriur e Glion pudì producir dapli energia.

Concret: las Ovras electricas Rain anteriur 984,1 milliun uras kilowatt (+130.3 muk l'onn avant); las ovras electricas Glion 295,2 milliuns uras kilowatt (+27.7 muk). Quai resorta dal rapport da gestiun 2014/15 (october - settember).

A la radunanza generala han ils responsabels da l’Axpo alura er discurri d’in fitg bun onn (per las OER èsi schizunt stà il terz meglier cun 15,2% dapli che l’onn avant). In dals gronds projects da questas ovras è stà da sanar la galaria da sviament dal lai a Runcahez. Plinavant han lavurers installà indrizs da protecziun sco tschabergals e barrieras vid ils implants per meglierar la segirtad da persunal e viandants.

Tar las OEG èn ils generaturs da las maschinas a Tavanasa e Pigniu vegnids controllads l’october ed il november 2014. Per inspectar e far pitschnas lavurs da mantegniment han ins svidà las galarias da Pigniu-Ruschein e Tavanasa-Glion. Quellas sajan en in stan excellent, èsi vegnì ditg.

Mir dal lai da fermada da Pigniu
Legenda: Mir dal lai da fermada da Pigniu RTR

Dividendas da 1,5 %

Las ovras electricas Rain anteriur pajan ina dividenda da 1,5 % (1,2 milliuns francs) sin il chapital d’aczias da 80 milliuns francs. Acziunaris èn l’Axpo Power SA (81,5 %), il chantun Grischun (10%) e las vischnancas da concessiun Medel, Tujetsch, Mustér, Sumvitg, Trun, Breil (8,5%).

Las ovras electricas Glion pajan ina dividenda da 1,5 % (750’000 francs) sin il chapital d’aczias da 50 milliuns. Acziunaris èn l’Axpo Power SA (85%), il chantun Grischun (10%) e las vischnancas da concessiun Glion, Breil, Vuorz ed Andiast (5%).

Artitgels legids il pli savens

Scrollar a sanestra Scrollar a dretga