Siglir tar il cuntegn
Inhalt

Surselva Grev accident a Laax

Dus grev blessads hai dà dumengia suentermezdi tar ina collisiun frontala a Laax.

Accident.
Legenda: Dumengia suentermezdi hai dà ina collisiun frontala a Laax. MAD, Polizia chantunala

A la fin dal vitg da Laax en direcziun da Schluein è in automobilist da 43 onns vegnì sin il vial oppost ed è collidà cun in automobilist da 76 onns che vegniva encunter. Ses figl dad 8 onns è vegnì blessà grevamain. La cunpassagiera da 77 onns en l'auter auto è medemamain vegnida blessada grevamain. L'um da 76 onns è vegnì blessà mezgrev, quel da 43 onns mo lev.

La via chantunala ha stuì vegnir serrada per radund in'ura. Las vias da guntgida èn spertamain stadas surchargiadas.

Bleras forzas da salvament al lieu

Dasper dus helicopters da la Rega, ambulanzas da l’ospital regiunal da Glion e da la sanitad da Cuira èn er ils pumpiers da Flem, la polizia communala e l’uffizi da construcziun bassa stads en acziun. Sco quai che la Polizia chantunala scriva, saja la via puspè vegnida averta las 17:40.

Daco che l’accident è capità, n’è anc betg enconuschent. La Polizia chantunala investighescha en chaussa.

RR novitads 12:00