Las plazzas nua ch’ils amfibis mettan ils ovs hajan il mument avunda aua, mo local possia dar memia pauca aua u esser memia fraid, ha ditg l’expert.
I n’ha bain betg pluvì u navì bler l’entschatta da l’onn, ma il mars, nua ch’igl è propi stà il temp principal per ils amfibis, hai tuttina dà bler’aua, e nus avain pudì observar che quest onn èn propi surproporziunalmain blers animals sin viadi, cumpareglià cun l’onn passà, cura ch’igl è stà bler pli sitg la primavaira.
Tunnels per animals pitschens funcziunan bain
RTR ha visità mez d’avrigl ils novs tunnels per amfibis ed animals pitschens tranter Rueun e Tavanasa. Tranter ils onns 2020 – 2025 vegn qua sanada la via chantunala. La via vegn auzada e sut la via vegnan construids total 31 tunnels per animals. Sco quai che Luis Lietha ha ditg, funcziunian quels tunnels bain, las experientschas fatgas fin oz sajan fitg bunas.
Nus avain pudì observar cun las registraziuns da video ch’ils tunnels vegnan utilisads fitg bain. Betg mo da rustgs brins e raunas da prada. Spezial è ch’er auters animals pitschens sco mieurs, reptils, e schizunt utschels ed utschels-mezmieur èn sgulads ed ids tras. Pia, ils tunnels èn vegnids duvrads propi fitg savens.
Pli baud vegnivan purtads mintga primavaira bun 1'000 rustgs sur via, betg che quellas vegnian mazzadas dals autos. Quai tutga bainspert tar il passà. Actualmain è dapli che la mesadad dals tunnels per animals pitschens construida, a fin van las lavurs en dus onns. Ils tunnels custan radund 2,5 milliuns francs.
