Siglir tar il cuntegn
Inhalt

Surselva Grischun dat 2,1 milliuns per pendiculara Salins-Cuolm da Vi

Sustegn finanzial dal chantun per la teleferica da colliaziun da la pendiculara Salins-Cuolm da Vi tranter Mustér e Sedrun. La regenza grischuna ha deliberà ina contribuziun chantunala dad 1,1 milliuns francs sco prestaziun equivalenta tar il credit federal da 5,7 milliuns francs.

visualisaziun staziun per nova pendiculara Salins-Cuolm da Vi
Legenda: Visualisaziun da la nova pendiculara che duai colliar ils territoris da Sedrun e Mustér. mad

Sut il titel «infrastructuras relevantas per il sistem» ha la regenza grischuna concedì in'ulteriura contribuziun chantunala dad 1 milliun francs.

Las Pendicularas Mustér Sedrun Andermatt planiseschan da remplazzar la sutgera Sedrun-Cungieri, ch'è vegnida allontanada l'onn 2006. Plinavant duai quella vegnir prolungada cun ina teleferica moderna fin al territori da viandar e da sport d'enviern Mustér. En il sectur da l'anteriura staziun da muntogna Cungieri è previsa ina pussaivladad da sortir e d'entrar alpina.

Ensemen cun il stabiliment d'apport Salins – Cungieri – Valtgeva vegn realisà en il territori Cuolm da Vi in runal da trenament sco stabiliment accessoric. Quel permetta sin passa 2200 m s.m. ina purschida cun ina garanzia da naiv per principiantas e principiants. Ina part integrala dal project general è er in indriz da far naiv en il territori da sport d'enviern Mustér tranter Gendusas e la staziun da val a S. Catrina inclusiv in lai d'accumulaziun.

Er il chantun Uri ha decidì da pajar ina contribuziun da 196'700 francs vi da la nova pendiculara.

RR novitads 10:00