Siglir tar il cuntegn

Header

cuntegn

Surselva Grischun ha sut controlla la palusa bletscha

Las controllas han mussà: Da las 130 alps da nursas sajan stadas be pli duas contaminadas cun la palusa bletscha. Quai di Giochen Bearth, il substitut dal veterinari chantunal.

  • La bacteria che chaschuna la palusa bletscha na surviva betg l'enviern si d'alp. Ella vegn adina purtada da nov en las alps.
  • 13'000 nursas estras sin las alps en il Grischun èn in privel, cunquai ch'ellas na vegnan betg controlladas uschè bain.
  • Ina banca da datas naziunala per nursas dess ina survista ed ameglierass uschia la situaziun.

Ch'il chantun Grischun è sin buna via cun sias mesiras cunter la palusa bletscha mussan ils dus cas da contaminaziun da quest onn da maniera exemplarica. Las duas alps ch'han gì cas da palusa bletscha sajan numnadamain tuttas dus cas extraordinaris, nua che la palusa bletscha è vegnida puspè purtada en Grischun.

audio
Bunura: Las nursas da Scharboda èn turnadas da l'alp
ord Actualitad dals 27.09.2018.
laschar ir. Durada: 3 minutas 9 Secundas.

Ils dus cas da palusa bletscha èn dus cas extraordinaris

In cas è quel dad in'alp cun be nursas da la Bassa. Da là damai, nua che la controlla n'è betg uschè rigurusa sco en il Grischun. En tut vegnan chargiadas var 13'000 nursas da la Bassa sin differentas alps grischunas.

L'auter cas è in'alp grischuna che cunfinescha cun il Tessin. Giochen Bearth, il substitut dal veterinari chantunal, ha confermà a RTR che las nursas sin quella alp sajan vegnidas infectadas pervi dal contact cun las nursas da l'alp tessinaisa.

A partir da l'auter onn duai dar ina banca da datas naziunala per las nursas. Lura spera Bearth ch'era ils auter chantuns dumognian la malsogna contagiusa.

Scharboda sco bun exempel

Las passa 100 nursas da Scharboda sur Vrin han pudì turnar a chasa quest atun saunas e grassas. Lur pastura Pia Solèr è cuntenta dad avair bandischà la palusa bletscha da l'alp. Erwin Vincenz, il veterinari da Vella, è persvas che la buna collavuraziun tranter purs e veterinari haja gidà da dumagnar la palusa bletscha.

Grischun cun controllas rigurusas exempel per auters chantuns

Durant l'enviern e la primavaira vegnan las nursas controlladas e be, sche tuttas en saunas dastgan ellas vegnir chargiadas. Uschia sajan ils purs vegnids sensibilisads e quai haja purtà fritg.

RR novitads 06:00 / actualitad 07:00

Artitgels legids il pli savens