L’Uniun Lag Salischinas ha la finamira da promover e sustegnair il project Salischinas che preveda d’eriger in lai natiral da far bogn, in lai da pestga, ina tratga da peschs sco era la revitalisaziun dal Rain en il territori da Salischinas en la vischnanca da Sumvitg. Quai tranter auter per promover il turissem da stad, generar plazzas da lavur u era augmentar l’attractivitad d’abitar en la regiun ed uschia retegnair la depopulaziun.
Mess ina auta finamira
Grond plaschair ha il nov elegì president da l’uniun Rino Caduff da la preschientscha dals giuvens. «Quai fa speranza. Pertge en sasez na vulain nus betg realisar quest project per nus mabain per la giuventetgna ed els han mussà interess e quai è fitg impurtant». Sco emprim giaja quai ussa da recaltgar ulteriurs commembers. La finamira saja dublegiar il dumber actual di Rino Caduff. Uschia possian ins demussar fermezza envers autoritads ed instituziuns. Dasperas vegn persequità vinavant las mesiraziuns da l’aua en il territori da Salischinas per uschia lura savair co agir vinavant.
La via saja lunga. La finamira da Rino Caduff è dentant dad avair il project en trais onns. Quai saja ina finamira fitg auta ha el manegia envers ils preschents. Mo sch’ins discurria da 5 onns lura giaja quai anc pli ditg. I saja enorm impurtant da tegnair la dinamica. Ils commembers stoppian vesair ch’i curria e passi insatge, di Rino Caduff. Pertge sch’ins laschia luc, lura giaja il curaschi e la persvasiun a perder ed il project sa durmentia en.
En la suprastanza èn vegnids elegids:
- President: Rino Caduff
- Actuar: Fabian Collenberg
- Cassier: Guido Wieland
- Responsabel tecnic: Curdin Maissen
- Assessurs: Andreas Baselgia, Andy Monn, Curdin Capeder, Jaqueline Walter, Luis Beer
- Revisurs: Claudio Cajacob, Willi Decurtins
Vinavant è vegnida elegida da la suprastanza ina gruppa accumpagnanta. Questa gruppa dovria quai per chattar bunas soluziuns per ils purs che dattan giu terren per il project. Quai saja numnadamain in punct central. Da questa gruppa fan part:
- Curdin Capeder (president da l’Uniun purila Surselva e possessur d’ina tratga da peschs en Lumnezia)
- Emanuel Giger
- Sep Benedetg Candinas
- Simon Cajacob
- Armin Cabalzar (president da l’Uniun purila Sumvitg)
RR novitads 06:00