Siglir tar il cuntegn

Header

cuntegn

Surselva Grond interess per parcellas da bajegiar per indigens

Las 8 parcellas da l’emprima zona da bajegiar per indigens a Schluein èn stadas vendidas entaifer curt temp. La segunda zona cun 10 enfin 12 parcellas duai vegnir averta bainprest.

Dapi che la lescha da planisaziun dal territori revedida è ida en vigur l'entschatta matg 2014 èsi fitg grev per las vischnancas da crear novas zonas da bajegiar. Cunzunt per vischnancas en la periferia da centers regiunals è quai in problem. Ellas han savens da cumbatter encunter la depopulaziun. I dess avunda interessents che vulessan bajegiar lur atgna chasa en in lieu ruassaivel e lavurar en il center. I na dat dentant strusch terren da cumprar, ubain che quel è bler memia char. Perquai han differentas vischnancas creà zonas da bajegiar reservadas per indigens. Uschia era la vischnanca da Schluein.

audio
Schluein - gronda dumonda per zonas d'indigens
ord RTR Audio dals 03.02.2016.
laschar ir. Durada: 2 minutas 38 Secundas.

2 zonas per total 18 enfin 20 chasas

Tenor il president communal da Schluein Bruno Wellinger, ha la vischnanca reservà duas zonas da bajegiar per indigens. L’emprima zona “Garneras” en il vest da Schluein cumpiglia 8 parcellas per chasas d’ina famiglia cun in’abitaziun integrada. Quella zona saja vegnida averta l'onn 2014 ed entaifer mo 3 mais haja quai gia dà 13 interessents per ina da quellas parcellas. Actualmain sajan els vi da contractar cun in interessent davart la vendita da la davosa parcella. Sco che quai saja reglà, cumenzia la vischnanca cun las preparativas per avrir la segunda zona “Claus” che cumpiglia parcellas per 10 enfin 12 chasas d’ina famiglia.

Interessant d’abitar a Schluein

Per Bruno Wellinger n’è quai grond interess per quellas parcellas betg ina surpraisa. D'ina vart dettia bleras persunas che veglian abitar a Glion, i na saja dentant quasi betg pussibel da chattar là ina plazza da bajegiar per ina chasa d’ina famiglia. Schluein haja talas parcellas. Per l’autra sa chattia Schluein tranter ils dus centers Glion e Flem/Laax/Falera. Era in bass pe da taglia e la scola primara che sa chattia anc en vischnanca sajan ulteriurs motivs, daco che Schluein saja in lieu fitg interessant per abitar.

Artitgels legids il pli savens