Dapli
L'Agentura solara svizra ha surdà a Genevra il «Premi Solar Svizzer 2015» ed il premi spezial «Norman Foster Solar Award 2015». Cun quels premis vegnan remunerads projects e persunalitads en connex cun l'energia solara.
Ils premis vegnan surdads en differentas categorias. Gudagnà quels han er ina rotscha persunas ed interpresas dal Grischun:
- Premi solar per persunas: Christian Hassler, Donat, pionier d'energia solara
- Premi solar per edifizis: bain da viticultura Davaz, Fläsch
- Premi solar per instituziuns: uniun stgaudament a distanza San Murezzan
- Premi solar d'onur: Felix Vontobel, vicedirectur da la Repower, Puschlav
- Diplom edifizi energia plus: chasa privata da pliras famiglias Gasser, Haldenstein
- Premi spezial Norman Foster Solar Award: edifizi da biro Cavigelli SA, Glion
- Diplom Norman Foster Solar Award: sanaziun chasa d'ina famiglia Walder, Schluein
Premi Norman Foster Solar Award
Il premi spezial «Norman Foster Solar Award» gudogna il biro d’architectura Vincenz Weishaupt da Glion che ha planisà l’edifizi da biro da la Cavigelli SA. Il concept da l’edifizi da biro ha persvas la giuria. Betg mo pervi da la tecnica installada, mabain era pervi da l’optica gartegiada. Cun gudagnar il premi spezial «Norman Foster Solar Award» è il biro d’architectura Vincenz era qualifitgà sco candidat per il premi solar europeic, che vegn surdà ils 23 da november 2015 a Prag.
Stentas per promover citad d’energia
Dapi l'onn 2011 posseda Glion il label da «citad d'energia». Il premi «Norman Foster Solar Award 2015» pudess gidar Glion da cuntanscher las finamiras pretendidas.
Sco citad d'energia sto Glion spargnar energia nua pussibel e nizzegiar nua ch’i va energia regenerabla. Promover la construcziun dad edifizis energia plus na saja betg simpel. Tenor Aurelio Casanova saja la suprastanza communala dentant vi da discussiunar ina nova lescha da bajegiar e fetschia differentas ponderaziuns, co dar ina sort bonus a persunas u interpresas che planiseschian in edifizi energia plus.