Ils organisaturs quintan dumengia, ils 22 da mars, cun passà 200 participantas e participants. Quai dettia dapli lavur, mo i saja era ina motivaziun e renconuschientscha per la lavur prestada, di Leo Condrau, il president dal comité d’organisaziun da la Trofea Péz Ault. Els hajan tranter 60 e 70 voluntaris che gidian els. Perquai ch’i haja avunda naiv possian ils campiuns giudair la tura da 14 km cun passà 1'700 meters d’autezza ed ils amaturs che van sin ina distanza da 9 km.
