Siglir tar il cuntegn
Inhalt

Surselva Gronda sperdita per la bieraria da Flem

La Aktienbrauerei Flem Surselva SA ha fatg l’onn da fatschenta 2016/17 ina perdita da radund 663’000 francs. La svieuta ha muntà a 1,4 milliuns francs.

Etichettas da buttiglias da biera
Legenda: Forsa daventan las buttiglias da las bieras da Flem ina giada raritads. RTR

Expensas spezialas da bun 390’000 francs hajan era engrevgià il quint da la bieraria, scriva il «Bündner Tagblatt» sin basa dal rapport annual. La raschun saja la decisiun da serrar il manaschi da bieraria la fin da settember. Senza quests custs fiss il minus stà quest onn da fatschenta circa tuttina aut sco ils davos onns.

Midà producziun senza success

L’idea da surdar la producziun da las bieras da Flem extern, a la bieraria Locher SA ad Appenzell, n’ha tenor il president dal cussegl d’administraziun Beat Glaus betg purtà il success spetgà. Malgrà questa mesira na sajan ils custs betg sa reducids. Plinavant è la successiun da Glaus anc adina averta, sco il «Bündner Tagblatt» scriva.

Ils acziunaris decidan

Entant che la bieraria ha sistì il manaschi la fin da settember, ha l’ustaria da la bieraria serrà sias portas la fin d’october. Davart l’avegnir da la bieraria decidan ils acziunaris a chaschun da la radunanza generala l’entschatta da december.

RR novitads 08:00