Che quai è uschia è plitost ina casualitad. Sco il dirigent da Las Bagordas, Serafin Beer, ha ditg a Radiotelevisiun Svizra Rumantscha ha el udì che Radio Pilatus ha fatg l’appel a las guggas da s’annunziar, sch’ellas vulan vegnir sin il disc.
Jau hai simplamain annunzià nus, e quintà che quai na gartegia uschia ni uschia betg.
Cura ch’i haja la finala gì num che lur musica da tschaiver possia ir cun las autras 17 guggas a Hochdorf e registrar in da lur tocs, hai gì num per Serafin Beer raquintar a la suprastanza sco era als commembers, tge ch’el ha fatg. Ils commembers èn lura la finala stads d’accord da far il viadi a Hochdorf (LU).
Tenor Serafin Beer èsi ina onur dad astgar sa preschentar en il chantun Lucerna. Quai saia fitg spezial, perquai che Mustér ha il medem temp sco Lucerna tschaiver, uschia ch’i n’è betg pussaivel a Las Bagordas da sa participar al tschaiver a Lucerna.
Rockà la tribuna
Il producent dal disc, Sämi Deubelbeiss da Radio Pilatus, ha ditg ch’el haja gia fatg vacanzas a Mustér ed uschia haja el gì plaschair che Las Bagordas èn s’annunziadas. «Jau hai lura pensà, tgisà sche quels san lura era sunar bain? Mo suenter ch’jau hai tadlà la prova musicala ch’els han tramess èsi stà cler: Las Bagordas ston sin quest disc» declera Sämi Deubelbeiss.
La saira ch’ils tocs da tut las guggas èn vegnids registrads a Hochdorf han Las Bagordas lura anc ina giada fatg surstar il redactur dal Radio Pilatus. Sper las duas giadas ch’i hajan gì da sunar il medem toc per la registraziun, hajan Las Bagordas anc stuì dar enturn 5 tocs supplementars. perquai ch’il public ha giavischà quai.
Il toc registrà è in medley cun il tetel «Bi en c» ed è a disposiziun a partir dals 8 da schaner. L'arranschament, scrit da commembers da Las Bagordas, cuntegn ils toc:
- «Crazy In Love» (Beyoncé)
- «Get Lucky» (Daft Punk)
- «What Is Love» (Haddaway)
- «Thrift Shop» (Macklemore)