Siglir tar il cuntegn
Inhalt

Surselva Ha Glion emblidà ils da Duvin?

Quai dumondan ils da Duvin sin fundament d'ina brev ch'els han survegnì da la vischnanca da Glion. Cun la fusiun tar Glion han ils da Duvin pers l'avantatg da pudair retrair l'abunament d'ir cun skis sco indigens a Sursaissa Mundaun.

La scola e la baselgia da Duvin in bellezza di d’enviern
Legenda: Duvin n'ha betg gondas purschidas da sport durant l'enviern. RTR, L. Livers

En il terz onn dapi la fusiun cun Glion è quai avantatg vegnids stritgads da las pendicularas, e la vischnanca ha giu l’obligaziun malempernaivla da communitgar quai.

Quai ha procurà per malaveglia a Duvin, surtut famiglias cun uffants sa sentan cugliunads. Il fatg saja fitg simpel, di Aurelio Casanova, il president da vischnanca da Glion. Las pendicularas da Sursaissa Mundaun sajan in’interpresa privata e sappian senz’auter decider quai uschia.

Per ils vischins da Glion vegni forsa a dar en l’avegnir tut autras pussaivladads. La vischnanca da Glion cunfinescha cun il territori da skis da Flem Laax Falera e cun quel da Sursaissa Mundaun. Sche quai avess da dar ina fusiun cun Vuorz ed Andiast, lura avess Glion era possess en la regiun da las pendicularas da Breil Vuorz Andiast. Igl è da far quint ch’ins na sa a lunga vista betg serrar ora ina part dals da Glion ed a l'autra vart dar las tariffas per indigens. U per dir autramain: las alps da Ruschein ni da Luven tutgan era a quels da Duvin e viceversa.