La fin da l’onn da scola 2013/2014 ha la claustra da Mustér stuì prender la decisiun ch'ils scolars na dastgan betg pli far pli gimnastica en l'atgna halla da gimnastica. En la cuvrida dal palantschieu hai rusnas e far gimnastica sin quest palantschieu fiss memia malsegir.
Sco quai ch’il mainafatschenta da la claustra Peter Binz ha ditg, custa la sanaziun 900’000 francs. Ina differenza da 300’000 francs envers la summa ch’era vegnida communitgada la stad passada. Sco il rectur da la claustra Bruno Hensler ha ditg a Radiotelevisiun Svizra Rumantscha ha la stimaziun da la stad stuì vegnir curregida suenter che la substanza dal bajetg è vegnida examinada e la calculaziun en detagl è stada fatga.
Vendita da buttiglias n’ha anc betg gì success giavischà
La finanziaziun da la sanaziun n’è anc betg segirada. Per la sanaziun han ins reservà daners da la contribuziun chantunala per investiziuns che las scolas medias survegnan e da l’autra vart duain era ils scolars sa gidar. Quai cun vender buttiglias da baiver cun inscripziuns per part signadas da l’avat Vigeli Monn.
Enfin ussa hajan ils scolars pudì recaltgar uschia 25’000 francs. La finamira è da cuntanscher enturn 80’000, ha Peter Binz ditg. Suenter las vacanzas da Pasca duai la scola claustrala puspè daventar pli activa cun vender las buttiglias. Fin ussa èn els stads occupads cun la turnea dal chor.
Sanaziun durant vacanzas da stad
Sper il palantschieu vegnian era las fanestras sanadas e la halla sto vegnir adattada a las perscripziuns actualas ed i sto dar ina extrada d’urgenza. Peter Binz quinta ch’ins haja ils daners per sanar la halla durant la stad uschia che quella stat puspè a disposiziun a la scola claustrala.