Hedy Nay da Laax è turnada ier saira da Nepal. Ella era là cun ina gruppa da 10 persunas, da las qualas 6 èn ussa turnadas en Svizra. Per ils proxims 4 èsi previs in sgol enavos damaun mesemna.
Il viadi en il Nepal han Hedy Nay e ses ami Mathias Gutmann fatg per visitar ina maridaglia d'ina Sursilvana cun in Scherpa. La maridaglia era gia a fin cura ch’il terratrembel ha cumenzà. Per la gruppa da 10 ch'era cun Hedy Nay tar parents dal spus ina sgarschaivla surpraisa. Là nua ch’els eran n'è la devastaziun betg stada uschè gronda.
Mo las infurmaziuns ch’els survegnivan toc a toc han laschà supponer che la regiun en la quala els stuevan ir per sgular enavos en Svizra era pli pertutgada. A Lukla, nua che Hedy Nay ha vis ina tavla cun inscripziuns da nums ch'eran sparids, ha ella survegnì tema da quai che spetga sin els en la chapitala da Kathmandu. Arrivads a Kathmandu, han els vis il caos che regiva sin la plazza aviatica. La devastaziun da la citad n'han els betg vis. Quai era territori serrà.
Enavos en Svizra è Hedy Nay conscienta dal cletg ch’els ha gì dad esser il mument dal terratrembel en in lieu segir.
