Ussa dat ina via ch’è vegnida meglierada dacurt da discussiunar. Igl è ina via da funs che maina da la via principala sin il prà nua che la 7132 SA da Remo Stoffel lascha atterrar ils helicopters cun ils giasts per las suitas a Val S. Pieder.
Inqual Lumnezian suppona che la via saja vegnida meglierada per avair in meglier access cun auto al plaz d’atterrar. Il possessur dal prà, Stefan Jacob dementescha dentant quai. «Jau hai prendi davent il tschispet ed emplenì si las rusnas cun material per pudair charrar meglier sin il prà cun mias maschinas agriculas», ha Stefan Jacob declerà a Radiotelevisiun Svizra Rumantscha. Ina lavur da mantegniment da la via ch’el haja gia daditg gì planisà da far. Sco quai ch’el ha ditg, haja el ussa dentant survegnì ina brev da la vischnanca che pretendia in stop da construcziun e ch’el stoppia prender posiziun aifer 10 dis.
La vischnanca n’ha betg pudì prender posiziun en chaussa, damai che quai saia in procedura currenta, ha ditg il president da vischnanca Duri Blumenthal.
