Betg dal tut fin Val s. Pieder, il helicopter sto sa tschentar avant a Suraua. La vischnanca da Val è memia auta sur mar e vala sco plaz da sa tschentar da la muntogna. Per da quests plazs en la muntogna na datti strusch novas lubientschas. Perquai ha la 7132 SA elegì la fracziun lumneziana da Tersnaus sco in pussaivel plaz da sa tschentar.
Per pudair sa tschentar sin in tal plaz dovri mo la lubientscha dal possessur dal terren e dal magiur dal prà. Tut las autras lubientschas per sgular e sa tschentar van sur la basa da helicopters e quai è la basa a Tavanasa. I dovra pia naginas lubientschas da la vischnanca u dal chantun, per sa tschentar en Lumnezia sut. Quai attestescha Urs Holderegger, il manader da communicaziun da l’uffizi federal d'aviatica civila (BAZL). Il plaz sper la chaplutta da s. Chatrina a Tersnaus è ideals per sa tschentar manegia Ernst Senteler dal cussegl d’administraziun da la Priora Projekt SA, quai plaz n’è dentant betg il sulet ch'el ha evaluà. Senteler quinta da pudair sa tschentar sin differents plaz en la Lumnezia sut. El possia meter avant dad era sa tschentar a Peiden Bogn u ad Uors cun il helicopter da la 7132 SA.
Sgulà vegn cun in helicopter dal tip Eurokopter 130 D2 porscha plaz a 7 passagiers ed il pilot. I sa tracta dal pli ruassaivel helicopter ch’i dat actualmain sin il martgà.
Anc ha la 7130 SA be trais suitas nua ch’il servetsch da sgular cun il helicopter è integrà. Sche la tur vegn bajegiada sa midas quai dal tuttafatg. La en 100 suitas che pon far diever da questa purschida. Perquai ha la 7132 SA era deponì ina dumonda tar il BAZL da pudair installar ina plazza da sa tschentar da muntogna en il vitg da Val s. Pieder. Quests plaz en limitads sin 40 per l'entira Svizra. Ernst Senteler vesa dentant bunas schanzas da survegnir ina tala lubientscha, sche la tur vegn realisada.