Siglir tar il cuntegn

Header

Il nov hotel  Miraval.
Legenda: Il nov hotel Miraval. RTR, L. Livers
cuntegn

Surselva Hotel Miraval a Cumbel avra cun purschida reducida

Ils dus cumpraders da l’anteriura chasa da tgira Lumnezia – ils impressaris Daniel Blumenthal e Gion Martin Collenberg – èn dus che fan guttas cun chau.

Els èn ils tipics «Machers», sco quai ch’ins schess per tudestg. Da la preschentaziun da lur nov project «hotel Miraval» traglischavan omadus ed ins sentiva il plaschair dad els d’avair reussì. Quai ha dentant duvrà in pulit sforz da vegnir a fin sin Nadal, manegia Daniel Blumenthal.

Cumparegliaziun dals maletgs

Stuschar reglader a sanestraStuschar reglader a dretga
Legenda:Avant e suenter: il nov hotel Miraval a Cumbel.

In manaschi reducì è quai che Collenberg e Blumenthal pon porscher durant l’emprima stagiun. Quai vul dir: i dat in hotel cun la purschida da garni, pia mo cun solver e star sur notg.

audio
Bunura: Hotel Miraval a Cumbel avra parzialmain
ord Actualitad dals 18.12.2015.
laschar ir. Durada: 2 minutas 47 Secundas.

Las 25 chombras ch’èn gia semtgadas n’èn betg occupadas dal tuttafatg quest enviern. Quai fiss strusch pussaivel, manegia Daniel Blumenthal; els hajan strusch fatg reclama per lur hotel.

In concept che funcziunescha

Ina da las chombras renovadas da l'hotel.
Legenda: Ina da las chombras renovadas da l'hotel. RTR, L. Livers

Da l'autra vart èn las 9 abitaziuns che tutgan tar l’hotel gia occupadas cumplettamain. Duas da quellas èn a tschains l’entir onn, e set èn occupadas fin primavaira.

Areguard las investiziuns per l’hotel Miraval n’han ils investiders betg vulì tradir memia bler. Sulettamain quai han els ditg: il pretsch da cumpra per l’anteriura chasa da tgira da 1 milliun francs saja stà favuraivel. Ussa hajan els dentant gia investì plirs milliuns francs per far ordlonder in hotel.

Era la populaziun Lumnezia duai avair la chaschun da mirar l’hotel Miraval a Cumbel; quai pon ins far ils 29 da december durant il suentermezdi.

Artitgels legids il pli savens