Siglir tar il cuntegn

Header

video
Ina tura tras il Bogn Tenigia
Or da RTR Social dals 16.08.2021.
laschar ir
cuntegn

Hotel serrà Ina tura tras il Bogn Tenigia

Passa 30 onns n'ha quasi nagin pli dastgà ir en ils stabiliments dal vegl hotel da cura Bogn Tenigia en Val Sumvitg. Per nus ha il nov pedel avert las portas e fatg cun nus ina pitschna tura privata tras il temp.

La Val Sumvitg è ina val selvadia, pittoresca, misteriusa, profunda e bella. Ella s'avra e sa serra e tuttenina suenter la radund 57avla storta vegn in enclar, sin quel in starment cumplex da hotel. Dentant in ch'è dapi 30 onns vid. Oz è il Bogn Tenigia plitost enconuschent sco baracca ch'è plaunsieu vi da smarschir. Fanestras en stgaglias, lautgas e barcuns ch'ins tema ch'els sballunian sut ina in zic memia grossa scrotta da naiv e stgarps en la fatschada.

L'istorgia dal bogn Tenigia

Avrir la box Serrar la box

L'emprima giada vegn il Bogn Tenigia numnà en in document dal 1580. Radund 100 onns pli tard cumpra il «Landrechter» Nikolaus Maissen il bogn e bajegia l'emprima chasa da bogn sco er la chaplutta «Nossadunna da la naiv». Adina puspè mida il bogn possessurs, il 1886 cumpra Stanislaus Caplazi da Rabius il bogn e bajegia ina «dépendence». L'onn 1909 nescha la Waldhäuser SA cun il nov bajetg da hotel en «Jugendstil». Il turissem da cura flurescha.

En ses megliers temps è il Bogn Tenigia stà in resort da luxus per far curas d'aua minerala. Cun l'aua da la Val Sumvitg possian ins curar mals e catars da tuttas sorts, stat scrit en vegls prospects. En ils onns enturn il 1900 ha il directur Stanislaus Caplazi carmalà numerus giasts cunzunt da la Germania en la Val Sumvitg. Anc oz èn ses stadi decadent è da vesair, tge bischu da «Jugendstil» ch'il hotel è stà.

Cun la Segunda Guerra mundiala han ils osps dentant entschet a mancar. Er ils collavuraturs da l'hotel han sentì la guerra. Amalia Caplazi che ha lavurà en l'hotel raquinta:

Nus survegnivan da magliar savens tartuffels brassads, dentant senza paintg, quel era per ils giasts
Autur: Amalia Caplazi anteriura collavuratura da l'hotel

La guerra ha lura er muntà la fin da l'hotel. Il 1951 ha el serrà sias portas ed è daventà proprietad da la Banca Chantunala Grischuna. Lezza ha anc insaquants onns dà a tschains l'hotel a duas soras Ferroni Ellas han purschì champs da vacanzas per uffants en l'hotel. Dentant il luxus aveva bandunà la val.

La èra Schulz

Tant pli cuntents eran ils indigens cura che Ernst Ludwig Schulz, in impressari ritg da Frankfurt, è vegnì cun ina visiun d'in nov hotel da luxus en la Val Sumvitg. L'onn 1970 ha el cumprà per 200'000 francs ils stabiliments dal bogn ed invistì 15 milliuns francs en in nov hotel cun 3 bogns sper il vegl. L'onn 1974 è stada l'avertura – il luxus è turnà, dentant be curt. L'emprim onn èn ils giasts vegnids, dentant gia il 1976 ha l'hotel puspè stuì serrar.

Er las emprovas da reactivar l'hotel en ils onns 90 ensemen cun la vendita da l'aua minerala han fatg naufragi. L'hotel è restà serrà e dapi passa 30 onns na dastga nagin pli entrar, auter che mastergnants ubain interessents che pudessan s'imaginar da cumprar il cumplex. E da quels haja quai dà blers da la China, da l'Arabia e da Turitg. «Dentant sco ins di, haja Schulz pretendì in pretsch memia aut», raquinta l'anteriur pedel da l'hotel, Toni Cathomas. El ha tegnì 39 onns ditg la dira, schubregià e protegì l'hotel enfin sia pensiun l'onn 2012.

Gia vis? – Da strias, urs e bellezzas zuppadas...

Avrir la box Serrar la box
Gia vis? – Da strias, urs e bellezzas zuppadas...

Tge ha il «Lai da las strias» propi da far cun strias? U savevas ch'i dat en la Val di Campo in lai ch'exista be la primavaira e nua ch'i vegn schizunt sfunsà? Tals lieus spezials ma pli pauc enconuschents datti blers en il Grischun.

RTR scuvra intgins questa stad. Qua datti la survista da tut las istorgias.

En nossa seria auditiva raquintain nus cun agid da regurdientschas, da l'archiv, e d'impressiuns actualas l'istorgia da la fluriziun, stagnaziun, renovaziun e decadenza da l'hotel Tenigerbad.

RTR actualitad 07:00 / Telesguard 17:40

Artitgels legids il pli savens

Scrollar a sanestra Scrollar a dretga