Rodund 60 persunas dal Hamburger Sport-Verein (HSV) èn a Laax e sco quai che la pledadra da medias da l’Arena alva, Katja Kamps ha ditg a Radiotelevisiun Svizra Rumantscha n’han ils stars da ballape da la Bundesliga betg giavischs spezials. «Per nus èsi impurtant da pupragnar quest giasts sco tut ils auters giasts era» declera Katja Kamps. Era puncto cuschina n’han ins betg da far chaussas ch’ins na fiss betg gia disà da far. I dettia era qua persunas vegetarias u bain persunas che n’astgan betg mangiar tratgas cun glutin, sco tar ils auters giasts era. Per il HSV vegni mintgamai a dar in buffet cun ina vasta purschida da differentas tratgas uschia che mintgin possia eleger quai che plascha.
Reclama per la regiun
Per la destinaziun da turissem Flem, Laax, Falera è la visita dal HSV era reclama. Las medias rapportan dal camp da trenament e fan uschia enconuschent la destinaziun en la Germania dal nord. Ins spera sa chapescha che quai portia nova clientella, declera Katja Kamps.
Visitas ord la patria
Katja Kamps sezza sa legra spezialmain sin la visita dal HSV, perquai ch’ella sezza vegn da Hamburg. Per ella èsi uschè da dir visitas ord la patria.
