Var 130 persunas en stadas preschentas, ed igl è per ina giada betg vegnì discutà sur da chatscha, chavacristals e trutgs scumandads u lubids. Il nov credo ch' è vegnì proclamà a Vella è sta, il parc cumplettescha, protecziun e svilup, la cuntrada vegn reconquistada. Tuns ch’ins n'ha anc betg udì en connex cun il parc Adula.
Ils referents Gion Antoni Caminada, l'architect da Vrin, e Peter Messerli, il professur emerità da geografia da la universitad da Berna, han tratg vid la medema suga cun declerar tge è parc.
I dettia abitants en il parc, dentant betg abitants dal parc. Medemamain ha Messerli constatà che tut quai che vegni concentrà per exempel a Cuira u en auter centers economics, saian schanzas per la regiun dal parc dad esser auter. Quai «esser auter» saja numnadamain quai che vegn tschertgà e quai che fa ch' ins possia viver dal parc.
En la discussiun al podi è era quai vegnì tractà anc ina giada. Ils osps na stoppian betg esser solidaricss cun quels da la muntogna, ils osps stoppian daventar partenaris da quels da la muntogna. Sin il livel da partenaris na dovria er betg cumpassiun mabain in che porscha, ed in che prenda. Da tut las discussiuns ch' èn stadas fin ussa en connex cun il parc Adula è quella da Vella stada in'autra, quai ha pudì constatar l'auditori.