I manca anc la mesadad dals 15 milliuns

Proximamain decida la vischnanca da Mustér, sch’ella vul sustegnair la renovaziun da la claustra cun in milliun.

Claustra da Mustér Bild in Lightbox öffnen.

Legenda da maletgs: Claustra da Mustér tschertga daners per renovaziun. RTR, G. Hosang

En il messadi al cussegl da vischnanca propona la suprastanza communala Mustér da sustegnair la renovaziun da la claustra cun in milliun francs. L’import duai vegnir repartì sin diesch onns per ch’i saja supportabel per la cassa communala.

«  Nus na pudain betg simplamain scriver ina brev e dumandar per 100’000 fin in milliun francs. »

Vigeli Monn
Avat claustra da Mustér

Decisiun da Mustér vegn ad esser in ferm signal

Tenor Avat Vigeli Monn n’èsi betg in problem sch’ils daners vegnan pajads sur diesch onns, era sche la sanaziun è gia tenor plan finida pli spert. La garanzia ch’i dettia ils daners pussibiliteschia da parter en auter ils daners.

Ina contribuziun da la vischnanca da Mustér è tenor l’avat betg sulet impurtanta ord vista finanziala, mabain saja era in ferm signal. Cura ch’els giajan tar auters chantuns ed instituziuns lura veglian quels adina savair quant fitg che la regiun sustegnia la renovaziun. «Uschia pudain nus mussar si la muntada e la solidaritad» declera el.

Cumenzar l’auter onn cun la renovaziun

Cumenzà cun recaltgar daners han ins l’october passà. «Qua na pudain nus betg simplamain scriver ina brev e dumandar per 100’000 fin in milliun francs», di Vigeli Monn. I saja d’envidar ils responsabels en claustra per pudair mussar pertge ch’i dovra uschè blers daners.

Enfin ussa hajan ins bun 7,5 milliuns francs. Era sch’igl è pir la mesadad da la summa ch’i dovra è Vigeli Monn cuntent cun il resultat. El spera ch’i vegnia anc intginas grondas summas ch’èn anc avertas.

Daners tanschan gia per la fatschada dal sid

Per l’emprima etappa da renovaziun, numnadamain per la fatschada dal sid da la baselgia, tanschian ils daners gia. Uschia ch’ins po cumenzar cun questa renovaziun l’auter onn. Silsuenter vegn la fatschada da l’ost renovada e 2018/19 duai l’intern da la baselgia vegnir renovà. Fin lura spera l’avat Vigeli Monn d’avair recaltgà ils 15 milliuns.

Il cussegl da vischnanca decida ils 21 d’avust davart il credit. Il pled final ha dentant la populaziun tar ina votaziun all’urna.