La dumonda sa tschenta: Daco n'èsi betg stà pussaivel da persvader la populaziun per il parc? L'uniun Parc Adula ha lavurà 16 onns vid questa materia, fatg nundumbraivlas orientaziuns, edì carnets e cudeschs dal Parc Adula – tut adumbatten.
Ins ha vulì vender in parc Naziunal Adula che protegian la natira, che promova l'economia. Quai spagat n'han ils promoturs betg pudì vender a la populaziun. U che ni che, quai avess la populaziun plitost cumprà. Vitiers è vegnì che las uniuns da l'ambient èn s'annunziadas questa primavaira gist en ina fasa decisiva. L'emprim fundar e lura guardar e far midadas sche necessari, uschia han ellas proclamà il parc. Quai experiment da fundar e lura sviluppar vinavant n'è betg vegnì sustegnì da la populaziun.
La malsegirtad è naschida. Datti ussa restricziuns en la zona perifera u betg? Co vegn l'ordinaziun da parcs interpretada? Questas malsegirtads n'è l'uniun dal Parc Adula betg stada abla d'eliminar, n'er betg cun repeter sco in mantra ch'i na dettia naginas restricziuns en la zona perifera. Quai ha per fin survegnì in'atgna dinamica ed è daventà l'argument principal encunter il Parc Adula.
E sco sch'i n'avess betg tanschì cun malsegirtads èsi vegnì vidlonder che las uniuns per l'ambient ha gudagnà a Losanna encunter l'ovra electrica da Zervreila che leva manar l'aua da Vrin enfin a Val. Er il project d'ennevar a Val vegn retardà entras in recurs medemamain da las uniuns per l'ambient. Ils resultads da Val e Vrin èn franc in resultat da quai ch'è capità l'ultim temp.
Dapi 16 onns è vegnì lavurà vid il Parc Adula. Quai che resta è gnanc stgaglias – i resta simplamain nagut.
RR novitads 18:00
