I vegn stretg per la construcziun da la sutgera Alpsu – Calmut

Malgrà la che la lubientscha è avant maun dapi il fanadur, na po la sutgera Alpsu-Calmut anc betg vegnir construida. La raschun è che las dretgiras uranaisas han davent da mez fanadur fin mez avust vacanzas ed i na po betg vegnir inoltrà recurs. Uschia cuzza il temp per far recurs fin mez settember.

Differents purtrets da la sutgera che duai vegnir construida sin il pass Alpsu. Bild in Lightbox öffnen.

Legenda da maletgs: Ina sutgera da sis duai manar en il futur ils skiuzs dal pass da l'Alpsu fin sin il Calmut mad

I saja in risico da cumenzar cun la construcziun da la sutgera pir il settember, declera il pledader da la Andermatt Swiss Alps SA, Markus Berger. «Per propi construir la sutgera stuain nus igl emprim disfar il runal existent» declera Markus Berger. Sch’i dettia il settember baud naiv ch’impedeschia lura da finir la sutgera, n’hajan ins nagina colliaziun en il territori da skis davent da l’Alpsu. Ils giasts stuessan cuntinuar il viadi fin a Dieni per pudair ir cun skis. Perquai vegn ussa calculà intensivamain sch’i tanschia da construir la sutgera ed avrir questa sin la stagiun d’enviern.

Probabel nagins recurs

Vinavant vegn era ponderà e discutà tge ch’ins po gia preparar avant ch’il temps da recurs e scadì. Markus Berger di ch’ins patratgia qua vid drizzar en il plazzal da lavur ubain vegnir cun il material sin il plaz per uschia spargnar in pau temp. Ch’i dettia anc recurs che pudessan impedir in cumenzament da construcziun il settember na crai Markus Berger betg. Tut quels che hajan il dretg da far recurs sajan vegnids involvids gia tar la dumonda da construcziun uschia che tut ils giavischs sajan resguardads en la lubientscha.