Siglir tar il cuntegn

Surselva Il bab dal Parc La Mutta

40 onns ha Ignaz Cathomen fatg guids en il parc da megalits a Falera. Quest onn vegn ad esser il davos onn per il guid da var 85 onns.

Quants guids ch’el ha fatg en sia vita na sa Ignaz Cathomen betg dir. I pudessan esser enturn 1000. Segir è mo che dapi l’onn 2003 – cura ch’il Parc La Mutta Falera è vegnì fundà – han el ed ils auters guids dal parc fatg 999 guids. E la sonda hani fatg igl 1000avel.

Quai hani festivà a Falera. Adequatamain cun in guid da levada da sulegl a las 06:00 la damaun – er sch'i aveva memia bleras nivlas per pudair vesair la levada dal sulegl.

Tuttina è vegnida massa glieud a Falera per anc avair la pussaivladad da tadlar Ignaz Cathomen a raquintar tut ils fatgs e misteris davart ils megalits. Suenter quest onn chala el numnadamain cun ils guids e va cun 85 onns vairamain en pensiun.

Suenter il guid hai anc dà differents pleds, uschia per exempel da Reto Gurtner, il president da l’Arena Alva, u er il president communal Wendelin Casutt, che ha ludà Ignaz Cathomen, sco la persuna ch'ha dà al Parc La Mutta la muntada ch’el ha oz. Tenor el saja Ignaz Cathomen il «bab dal Parc La Mutta».

«Il cor ed il tscharvè dal Parc La Mutta» è el vegnì numnà da sia figlia e presidenta da cumissiun dal Parc La Mutta Claudia Cathomen.

Purschida impurtanta per Falera

Il Parc La Mutta Falera è in lieu da cult da megalits. El è il pli grond ed il pli impurtant parc da megalits en l’entira Svizra. Sa furmà ha il parc cun pli che 34 megalits avant var 3500 onns en il temp da bronz mesaun. Il parc è vegnì mess sut protecziun archeologica.

Ina purschida unica che ha ina gronda muntada turistica per Falera. Dentant er quella purschida ha da cumbatter cun las frequenzas.

RR sil punct 17.40