Suenter ils emprims trais mais po Herbert Schmelzer dir ch’el sa senta bain en sia funcziun sco manader dal Center da sport e cultura (CSC). La suprastanza ha elegì l’um da 51 onns che deriva dal chantun S. Gagl empè d’ina persuna indigena pervi da sias qualificaziuns. La vischnanca vul numnadamain che l’occupaziun dal center vegnia augmentada ed uschia il deficit annual reducids. In tschert success po Herbert Schmelzer gia preschentar. Per l’auter onn hajan ins pudì augmentar il dumber da pernottaziuns en ils tschalers da la protecziun civila per 20 % sin passa 15’000 pernottaziuns.
Adattar a las pretensiuns actualas
Herbert Schmelzer è persvas che quest dumber po anc vegnir augmentà pli fitg ed uschia era augmentar il diever da l’ulteriura infrastructura dal CSC. L’infrastructura che Mustér po porscher en il CSC sut in tetg è tenor Herbert Schmelzer numnadamain tschertgada. Sco el di hajan las gruppas che fan in champ en las localitads dal CSC dentant era ozendi pretensiuns e tar questas tutgian era localitads che fan ina buna parita. Ord questa raschun stuessi la fatschada e l’entrada dal CSC vegnir sanada tant pli spert per far ina buna impressiun tar ils giasts.
La politica dictescha il tempo
Per la sanaziun dal CSC datti bain plans. Quels ston dentant anc vegnir elavurai en detagl l’auter onn e la finala ha lura anc la populaziun da conceder ils credits persuenter. Herbert Schmelzer è conscient ch’el ha da lavurar bain ensemen cun la politica per pudair far las midadas necessarias e che quai na vegn magari betg ad ir uschè svelt sco quai ch’el avess gugent. Dentant vesa el era quai sco schanza. Uschia hajan las ideas temp da madirar, manegia el vinavant.
Era far insatge per ils indigens
Tenor Herbert Schmelzer na saja la populaziun gnanc conscienta tge stgazi che la vischnanca haja cun quest center. Perquai na pensa el betg mo vid ils giasts, mabain era vid ils indigens. Per quels vul el puspè laschar reviver durant la stad il kiosc che sa chatta sper ils plazs da tennis. Enturn quel duai quai dar in plaz da s’entupada cun ina fuaina en la quala in fieu arda sur mezdi per pudair grillar, star da cumpagnia e tgirar ils contacts.