Il mintgadi en l'ARGO a Glion – la chasa per persunas creschidas cun impediments – quel cuntinuescha era cun corona. Distanza, mascrinas e perscripziuns èn dentant omnipreschentas. «Ils clients van enturn bain cun quai» di Cornelia Mantel, la manadra da la chasa da dimora. Quai che manca dentant fitg, sajan ils contacts socials, la pussaivladad d'ir en sortida ubain s'inscuntrar era tranter las gruppas. Quai n'è betg pli pussaivel.
L'avantatg saja che tuts possian lavurar mintga di en il lavuratori ubain era en la chasa da dimora, quai saja ina da las chaussas las pli impurtantas.
Nus lain metter il focus sin quai ch'è anc pussaivel.
Tuttina para la situaziun d'esser fitg unfisaivla per Irena Cavelti, Brida Castelbert e Gabriel Perretta che vivan e lavuran en l'ARGO a Glion. «La sortida manca fitg, ir a baiver insatge ensemen» di Irena Cavelti durant ch'ella paina a maisa per il gentar communabel. Gabriel Perretta che lavura en la scrinaria è da l'avis ch'ins stoppia restar flexibel. Ses hobi è nudar, cunquai che gliez na va, sunia el simplamain la batteria enstagl. Dentant la glieud haja savens schletta luna pervi da quest corona e quai saja mintgatant insupportabel.
Ina da las plazzas da lavur da Brida Castelberg è la lavandaria. Qua lavura ella gugent, ussa simplamain cun mascrina. Per salvar la buna luna ha ella ina strategia, e quella è da simplamain ignorar e betg pli tadlar las novitads da la pandemia.