Il musical sa basa sin las perscrutaziun actualas da la fundaziun Anna Göldi en la citad da Glaruna. El raquinta surtut dal temp cura ch’ella era fantschella tar la famiglia Tschudi, ina da las famiglias ritgas e bainstantas en il chantun Glaruna.
audio
In'affera cun consequenzas
Anna Gödi ha in'affera cun ses patrun, il medi, politicher e derschader Johann Jakob Tschudi. Ma quel vul zuppentar l’affera e fa valair, che sia fantschella haja striunà sia figlia «Miggeli» uschè, che quella haja stuì render gluvas. Anna vegn torturada e sto conceder, ch’ella haja nizzegià las forzas dal demuni. Als 13 da zercladur 1782 mora ella sut la spada. Reabilitada vegn Anna Göldi pir l'onn 2008 – 226 onns suenter sia execuziun.
La vardad vegn a la glisch
En il musical emprova il schurnalist Heinrich Ludewig Lehmann da sclerir il cas. In motiv principal dal musical saja, che la vardad vegnia a la glisch, di il reschissur ed autur Mirco Vogelsang.
Els veglian era mussar pertge ch'i haja dà intrigas e co che quellas hajan fatg ir a la malura ad Anna. Sch'ina fama sa derasa pli e pli enfin che la persuna pertutgada vegn per la vita saja quai da congualar bain a quai ch'ins numna ozendi mobbing. Perquai saja il tema actual, di il reschissur. En ina istorgia criminala plain tensiuns ed emoziuns tracta il musical era temas sco amur, speranza, tema e schalusia.
Tocs tragics hajan grond succes
Musicalmain giaja quest musical en direcziun da «Les Misérables», nua ch’ins haja era ina tscherta tragica. Ils tocs tragics sajan quels che hajan ils pli gronds success sco per exempel «Phantom der Oper», «Titanic» ubain «Elisabeth». Els veglian sa metter en retscha cun quest gener da musicals, di Mirco Vogelsang.
Musical vegn dà passa 30 giadas
La musica han Moritz Schneider e Robert Emery scrit. Ils acturs principals èn tranter auter Masha Karell che represchenta Anna Göldi, Eveline Suter sco Elsbeth Tschudi e Simon Schnorr che represchenta Dr. Tschudi.
La premiera dal musical Anna Göldi è ils 7 da settember. Alura vegn il toc anc preschentà fin ils 22 d’october, e quai a Neuhausen.
Anna Göldi - il musical
RR actualitad 12:10