Siglir tar il cuntegn

Surselva Il pli lung ha da ceder – la Panera da Luven croda il december

Il pign il pli lung da la Svizra sto vegnir derschì or da motivs da segirtad, quai dentant pir la fin da l'onn.

Che la Panera sto vegnir derschida è gia cler dapi l'onn passà. Lura aveva il pign da passa 50 meters autezza entschet a setgar. Plirs selviculturs avevan attestà ch'il pign na possia betg pli vegnir salvà, er perquai ch'el haja probablamain passa 250 onns. Or da motivs da segirtad ha la vischnanca da Glion perquai decidì da derscher la Panera.

Cumparegliaziun dal maletgs

Stuschar reglader a sanester Stuschar reglader a dretg
Legenda:La decadenza da la Panera dals davos mais.La decadenza da la Panera dals davos mais.

Lavur da guaud il december

La decisiun da pinar la Panera pir il december è stada pussaivla perquai ch'il pign n'è anc betg dal tut sitg. La part sut da la planta è anc verda ed il privel ch'i pudess schabegiar insatge n'è perquai era betg imminent. Plinavant hajan ins vulì mussar respect envers la planta cun pinar ella durant il temp tradiziunal per lavurs da guaud, ha la presidenta communala da Glion, Carmelia Maissen, confermà envers RTR.

Il bau è la culpa

Experts da l'Institut federal per la perscrutaziun da guaud, naiv e cuntrada han analisà la planta e constatà ch'il bau-scorsa è la culpa. Las galarias dal bau hajan interrut il transport da suc en la planta e perquai haja la planta entschet a setgar vi. Daco ch'il bau ha tuttenina attatgà la planta na saja betg pli stà pussaivel d'eruir.

Chaussa emoziunala

Ina muntada speziala ha la Panera per ils abitants da Luven. Blers enconuschan ella da pign ensi ed i dess bleras istorgias da raquintar en connex cun quel pign.

Or da quest motiv duai la Panera, tenor Carmelia Maissen, n'era betg simplamain vegnir derschida e dismessa. I pudess dar ina pitschna occurrenza il di che la Panera vegn derschida. Tge che schabegia suenter cun la planta sezza, cun ils ca. 40 meters cubic lain, n'è anc betg decidì.

RR actualitad 07:20